Matan 31 Oktober 2008 sampai 02 November 2008 karajaan nagri Salangor di bawah Exco Pendidikan , Pengajian Tinggi dan Pembangunan Modal Insan , maulah kursus hagan satiausaha JKKK ( JKKK hanyar ). Wadahnya di Institiut Latihan Dakwah Salangor ( ILDAS ) di Sungai Lang, panghujung daerah Sabak Bernam.
Ada tiga daerah satiausaha JKKK nang disaru. Daerah Sabak Bernam, Daerah Kuala Salangor awan Daerah Gombak. Ada labih kurang tangah dua ratus orang nang datang. Taumpat jua ada baampat satiusaha JKKK bibinian ! ( Harat JKKK wayahni, ada satiusaha bibinian, kada kaya JKKK lawas ! ).
Sunyaan caramah bajalan bagus. Kadada masalah apa-apa. Tagal bila sampai caramah hagan balajar komputer, banyak satiausaha JKKK nang hudah masuk umur wagra amas mula kulimbisikan. Masing-masing bapadah kada suah maingkuti komputer !. Mana-mana nang baumur warga amas , tagal bakas cigu atawa ustaz kuranglah saikit kulimbisikan. Kawalah dipalar-palar….
Tukang ulah kursus pamulaannya maulah ‘ bancian ‘ malalui borang, hagan mangatahui hinggan mana pangatahuan satiausaha JKKK dalam komputer. Dalam kumpulan ulun - kumpulan A - bila diualah ‘ bancian ‘ parak saparuh kada suah maingkuti komputer !. Jadi, cigunya tapaksa mancarikan kawan satiusaha JKKK nang kada suah , awan satiusaha JKKK yang bisa ! ( Amun tidak, mau pang tadiam komputer kayaitu haja ! ) .
‘ Makmal Komputer ‘ di ILDAS kada banyak. Ada labih kurang 20 buah haja. Biliknya jua kipit. Jadi kami nang handak balajar tapaksalah bahimpitan duduk.
Nang mambari tatawa saikit, banyak satiausaha JKKK bila mahadap komputer, masing-masing manyaru ka cigu intak dilajari mamingkuti ‘ tetikus ‘ ( Pasalnya kada tahu handak manggarakkan ! ).
Nang disambat di atas tadi sahuaran…..
Sahuaran lagi, program nang dilajari oleh cigu komputer tu ada tiga bangsa : Word, Power Point awan Excel. Masanya sahibar dua jam haja di makmal !. Masing-masing hudah minik kapala. Nang kada tahu langsung, aur uling-uling kapala, pasal maulah petak ‘ program ‘ Excel kada mau jadi-jadi !.
Sampai habis dua jam di makmal komputer, masing-masing kaluaran. Di situlah macam-macam sambatan kadangaran . Ada nang manyambat bila maingkuti haja ‘ tetikus ‘ tarus barasa gadugupan jantung hati. Ada jua manyambat, bila hudah ditaip, tasalah picik tarus tapadam tulisan !. Ada jua nang balulucu sasama tuha, ujar hidin balajar komputer nyaman lagi wayah pamulaan jadi pangantin…….
Pandiran tu sampailah ka kanten makan….. Ulun saja-saja batakun ka babarapa orang satiausaha napa cadangan nang patut dipadahkan ka tukang ulah kursus (penganjur ). Masing-masing manyambat; Kursus kaya nang diulah kada kawa mambari kapintaran ka satiausaha JKKK. Ujar masing-masing, kursus kayaitu bagus diulah sahuaran-sahuaran. Contohnya , balajar Word dahulu , imbah tu hanyar Power Point . Pahabisannya hanyar balajar Excel. Wayah balajar tu pulang paling kurang mamakan saharian maning hagan sahuaran ‘ program ‘. Jaka tidak, kada mau jadi pintar !
Saja ngalih balajar banda hanyar, bila umur hudah tuha leh !. Tagal ujar Nabi Muhammad SAW: Balajar tu matan wayah di ayunan sampai ka liang lahad !. Jadinya, bujur kada ?.
2 ulasan:
Assalamualaikum Ustad,
Mun ada minat tu Insya-Allah pandai haja kalawasannya. Mun dah pandai kaluko nyanyat ai pulang...datang ka resepi gin handak dimasuk dalam komputer. Mun bisa ba internet, bah lagi am. Siap ada friendster lagi haha !!
Saja banaran ujar pian tu.
Tambahan pulang amun jadi s/u JKKK kada bisa manaip awan komputer , bilang ngalih banar. Wayahni taip biasa kadada bajual lagi dah....
Bat ulun ada taip letrik, dah jadi barang antik pang !.
Catat Ulasan