Pamulaan ulun mandangar sambatan ‘ methadone ‘ labih kurang satahun sudah. Wayah tu minantu ulun nang manyambat mahabarakan. Ujarnya, ‘ methadone ‘ tu ubat orang supaya jangan talalu katagihan awan dadah. Sabujurnya, rupanya gin ulun kada suah maniring ( paraya tahu , kada salah jua kaluko leh….)
Minggu sudah ulun tulak ka ‘ Hospital Tengku Ampuan Jamaah ‘ di pakan Sabak. Handak maambil ubat nang dibari doktor supaya sigar awak ( ujar ! ). Sambil mahadang ngaran disaru, ulun tatiring di higa wadah ‘ kaunter ‘ ubat batulis : RAWATAN METHADONE.
Marigap hati !..... Ujar ulu dalam hati: Ooooh di sini pang orang yang katigahan dadah maambil ‘ ubat ‘ nya….
Kada lawas datang saorang orang anuman. Umurnya labih kurang patangahan dua puluhan. Awak pinda maringking…. Basalawar jean . Kubas. Babaju kameja T tangan handap. Kubas jua….
Sambil bagamat mangilar orang nang duduk mahadangi ubat , labih kurang 15 orang ada di situ. Tamasuk ulun… Inya duduk di bangku sabaris awan ulun. Tajauh labih kurang lima buah kursi. Ulun bapiragah kada maharani inya datang ( pada hal hati ada ai managur…. ). Mata ulun basinghaja bapiragah maniring ka siaran TV di atas , hujung subalah kanan, parak bilik ‘ Rawatan Methadone ‘.
Ujar hati : Orang ni mau haja datang handak mainta ' tatamba methadone '. Bujur tangguhan ulun , andika ai …. Kada karasaan inya masuk mancirup ka bilik rawatan. Kada lawas, inya kaluar ‘ bilik rawatan ‘ sambil bajalan tunduk. Kada maniring orang kiwa kanan.
Kada lawas sabalum ngaran ulun disaru maambil ubat, datang pulang seorang ‘ pesakit ‘ kaya pamulaan tadi. Umurnya labih kurang haja tuhanya. Orang nang datang ni labih taruk tokohnya. Cara bapakaian awan panyakitnya …. Inya datang tarus masuk ka wadah rawatan. Kada lawas ianya kaluar . Bajalan kada papalingau higa mahiga.
Sambil ulun kaluar matan wadah ‘ farmasi ‘ , kaganangan ulun ka orang nang masuk Rawatan Methadone tadi. Sunyaan babangsa Malayu. Baagama Islam pulang !. Dimapatuai leh, andika ai....
Andika nang tahu banyak pasal ‘ methadone ‘ ( kulaan nang jadi doktor ) bagus mamadahkan ka kita sabarataan : Napa sabujurnya methadone tu ?....
Tiada ulasan:
Catat Ulasan