Amun kadada aralnya, bubuhan Banjar di Sungai Ganal, Salangor handak maulah majlis batahagaan nang dingarani ‘ Majlis Jamuan Hari Raya Haji ‘. Wadah diulah di Balai Raya Parit (4) , Jalan Hanyar, Sungai Ganal.
Ujar Pengerusi (?) Pertubuhan Banjar Malaysia (PBM) Cawangan (?) Sungai Ganal, Haji Maad Adnan ( Kami di Sungai Ganal manyambat Sidang Cincirak haja ! ), tarikhnya pada 11 Disember 2008, ari Kamis –tiga hari imbah Ari Raya Haji. Wayahnya matan pukul 9.00 baesukan sampai parak tangah hari.
Ujar hidin lagi, majlis tu diulah hagan bubuhan Banjar di Sungai Ganal (tautamanya) bakumpulan, bapandiran salajur maulah napa-napa ‘ projek ‘ nang patut diulah andudi, kada mangira napa pahaman politik masing-masing . Orang UMNO, orang PAS atawa orang KeADILan kawa haja umpatan datang !
Sahuaran lagi, ujar Sidang Cincirak, jamuannya ‘ istimewa ‘ banar. Insya Allah , wadai kepeng kada tatinggal ( Wadai orang Banjar napa… ) . Salain tu, hidin mainta bubuhan Banjar di wadah lain , kaya di Bangi, Tanjong Karang, Shah Alam nang kapingin handak bajujualan , boleh jua datangan.
Kaluko ada nang handak bajual baju parak ada ‘ lambang ‘ kulaan Banjar, kaset, CD lagu-lagu Banjar atawa napa haja nang dipikirkan kawa payu dijual !. Atawa ada nang handak bajualan ‘ ubat gancang bagawi' hajakah !…..
Amun kadada aralnya jua , ujar Sidang Cincirak , kumpulan madihin matan nagri Pahang Insya Allah datang maulah ‘ persembahan ‘ tamasuk jua sauting acara nang disambat ‘ penglipur lara ‘ oleh orang Banjar di kampong Simpang Lima, Sungai Ganal.
Cuma sahuaran hidin manyambat, hagan maulah majlis tu parlu ada duit !. Jadi, hidin mainta bubuhan Banjar kawa mandarma RM 5.00 saurang. Kuponnya tangah dicicir wayahni. Kupon tu pulang kainak dicabut hangan cabutan ‘ ngaran batuah ‘. Bungkusan hadiahnya ada dah nang manyanggupi !.....
Ujar hidin, wayahni parak 400 orang labih hudah bubuhan Banjar nang handak umpatan. Bahara majlis tu bajaya kaya nang dilagang.
Cumanya sahuaran ulun bapadah ka Sidang Cincirak, maulah majlis tu biar sanonoh. Ujar orang pintar wayahni , biar canggih bapatutan awan bubuhan Banjar Sungai Ganal nang pintar awan saraba bisa - kada bisa mawada haja !...
Majlis tu pulang, jangan ada sasiapa nang kapingin handak manjumput munafaat saurang haja. Atawa ujar disambat orang wayahni ‘ada udang di sebalik batu ‘ . Ada jua nang manyambat ‘ ada udang di sebalik mee bandung ‘ !. Taganang ulun wayah Masyuarat Agong PBM di Parit 10 Sungai Ganal bahari!.Babulan-bulan dalam web Ayuha Bapandiran (AB) masing-masing gigir pandiran mawada haja…. Jangan jadi kayaitu lah ! )
Ulun hudah bapadah ka Sidang Cincirak, amun kadada aralnya kainak ulun kapingin maulah ‘ persembahan IT ‘ wayah majlis tu diulah. Bukan apa, handak mamadahkan ka orang Banjar nang datangan, kita hudah ada laman web bahasa Banjar , nang kawa ditiring di saluruh dunia !. Kaya ‘ Ayuha Bapandiran (AB) tu.
Sasiapa bubuhan Banjar nang kapingin umpatan kainak, kawa manalipaun hidin di nomor 013-3003152. Kupon ada hidin manyimpani….
4 ulasan:
Ji,
Pastikan kupon tu kada baunsur lotri/waweh lah....ulun mawah pasal ada hadiah cabutan bertuah tuh...
barilaan, mun kada bujur..
Kupon tu sahibar baramian banarai. Hagan kakanakan di rumah bila bulik kainak adalah babawaan jer...
Sabujurnya kupon tu ' kad jumputan ' nang dibari ka bubuhan nang datang, dimasukkan dalam kotak, imbah tu dipilih. Siapa tamasuk ' ngaran batuah ' dapatlah ' jajan ' ( ujar Jawa ). Ada 30 ' hamper ' disadiakan oleh bubuhan Banjar Sungai Ganal!.
Datanglah...jangan kada datang !
alamak....
banjar piow.....
tarak paham.....
Ulun mambari patua amun handak paham mambaca blog ni :
1. Bakawan awan orang Banjar nang bisa basa Banjar.
2. Kawin awan orang Banjar nang bisa basa Banjar.
3. Amun pian anak Banjar , tagal kada pati ruhui basa Banjar, itihi Kamus Banjar.
4. Amun sunyaan kada kawa, paraya mambaca.... Ranai garutuk, kapala kada minik. Bujur kada ?
Catat Ulasan