Masing-masing kulaan nang ada baisi anak badua batiga sakolah randah atawa sakolah manangah, manyambat kikis duit di paket hujung tahun 2008 awan pamulaan tahun 2009 ni .
Ada nang bahabar habis parak tujuh ratus ringgit , ada nang bahabar habis paribuan ringgit , tamasuk batutukar pakaian anak sakolah . Sapalih ada jua nang bahabar tapaksa batukar motosila sikin hagan anak tulak ka sakolah manangah hari- hari….. Dimapatuai leh ! Handak baanak pang…..
Amun diganang, kayaitu pang jua kawitan kita wayah bahari handak manyakolahkan anak. Tambahan pulang wayah bahari pancarian sahibar mahadang bajual hasil banih haja. Anam bulan sakali. Susah sasusahnya ! .
Kada kaya wayahni, banyak hudah kawitan nang ada baisi kabun sawit. Kawa hidin ‘ mangatam ‘ 20 hari sakali !. Jadinya , amun dikira-kira kawitan kita bahari lagi ngalih pada kawitan wayahni.
Siapa nang jadi cigu atawa ustad , lain pulang kasusahan nang dirasani. Awal tahun ni lah masing-masing sebuk basisimpun darjah. Macam-macam paulahan tapaksa disalasaikan. Maklum hajalah….labih sabulan sakolah cuti. Sunyaan bahamburan, salain bahabuk sunyaan kursi meja.
Dalam pada itu ada jua habar nang kada pati nyaman didangar talinga. Ada ujar sakolah nang dimasuki maling wayah cuti panjang . Macam-macam hilangan. Sapalih tamasuk jua hilang wasi panutup saluran banyu. Ada nang hilang tambaga kapala paip bomba ! ( Ni kada lain maling nang bajual wasi buruk ka Hindu tu ampun gawian … ) .
Bila sunyaan nang disambat tadi bakajadian, kada lain Guru Basar atawa Pangatua sakolah pulang nang aur bagaru kapala. Kasusahan. Pusang fikiran !.
Amun cigu atawa ustad nang di bawah pantadbirannya sahibar kawa maniring mahadang napa diarah haja. Aduuuuuuh !, Sakit bangat fikiran Guru Basar atawa Pangatua sakolah ! .
Tagal, cigu-cigu atawa ustad nang di bawah jangan takurihing kanyamananlah…Tunggu ikam !. Amun takana maajar kakanakan hanyar masuk sakolah darjah satu atawa hanyar masuk tingkatan satu, di situ kainak ikam tahu napa susahnya maajar kakanakan tu !.
Amun maajar kakanakan darjah satu, siapa nang kada pati panyabaran mau haja lakas naik darah tingginya !.Napa kadanya …. Sapalih kakanakan tu aur manangis ingui-ingui ditinggalkan kawitan. Ada jua nang takutan ka cigu, handak bakamih gin takutan bapadah. Sudahnya napa ? Salawar atawa tapih jadi basah batubal !....Tumbar pang sabarataan…..
Bah…amun handak dipadahkan kisah maajar kakanakan darjah satu , rame banar. Ada nang mambari lilihan maniring, ada nang mambari sarik jua . Sunyaan cukup ! ( Siapa nang suah maajar, tahulah caritanya…. )
Babulik pulang pasal kikis duit nang disambat di atas tadi. Kayapa leh amun kawitan kakanakan tu sahibar bagawi jadi nalayan atawa bagawi maambil upah haja. Tantulah kasusahannya batindih-tindih babanding kawitan kakanakan nang boleh disambat ‘ orang berada ‘, kaya orang nang baisi bandang atawa kabun sawit tadi.
Di sinilah kita orang nang tamasuk kumpulan orang sanang, wajib basyukor ka Allah SWT !
Tiada ulasan:
Catat Ulasan