Kayapa kada disambat bulan auran, amun bilang tiap minggu , ari Sabtu awan ari Ahad aur manyasah orang aruh bakawinan haja !.
Sapanjang bulan 12 ni tiap ari Sabtu awan ari Ahad , minggu pamulaan sampai minggu pahabisan bulan 12 ni , ulun aur tulak ka rumah orang aruh bakawinan haja hari-hari. Bahanu taparak pada rumah, bahanu tajauh.
Walau kayapagin, ada rumah-rumah nang basaruan kada kawa ditulaki. Pasalnya ari tu ulun tabarung pulang tulak ka wadah jauh. Ada nang takana ( tapaksa ! ) tulak pasal taklimat, ada jua pasal saminar di Shah Alam atawa di Kuala Lumpur. Handak kada datang, kada kana pulang. Saurang hudah manyanggupi jawatan napa !.
Kasudahannya, wayah Parsatuan Banjar Malaysia (PBM) maulah masuarat agung gin ulun kada kawa tatulak !. Dimapatuai…..
Ari tu, salain ada orang lain tiga buah rumah nang baaruhan , bubuhan subalah rumah ulun umpat jua aruh bakawinan. Untungnya, hidin aruh bakawinan kali ni manyuruh orang baulah makanannya ( Ujar orang wayahni, pakai katering ! ). Jaka tidak, kada kawa handak tulak banyak rumah orang aruh ari tu…
Walau kayapagin, basukur ka Allah SWT awak kada garing. Jadi, kawalah tulak ka situ ka sini…Al hamdulillah jua ulun sampai wayahni kada bapantang makan napa haja ( Kacuali makanan nang kada dimakan orang . Batu ….kaluko !).
Di sini ulun handak mambari pandapat saikit pasal orang aruh bakawinan, khasnya di kuliling kampong ulun, Kampong Sungai Haji Dorani. Amun kada katuju awan pandapat ulun kainak, boleh haja andika nang mambaca mambari pandapat ( komen ) nang lain pulang.
Pakara nang ulun handak mabaharkan di sini kada lain pada pasal makanan. Pasalnya parak dua tahun ni rasanya , makanan orang aruh bakawinan ditiring ada balainan saikit pada nang sudah-sudah .
Partamanya, wayahni makanan-makanan orang aruh bakawinan kada lagi kaya bahari. Aur makanan nasi haja. Wayahni ada hudah makanan lain kaya bubur kacang, pacal, laksa atawa makanan lain nang kada tamasuk dalam ‘ sanarai ‘ makan orang aruh bakawinan.
Kaduanya, wayahni ‘ budaya ‘ manyadiakan jamuan manyuruh ‘ katering ‘ hudah bamula dituruti orang. Banyak hudah orang aruh pangantinan nang maulah kayaitu.
Kadua-dua ‘ paubahan ‘ nang disambat di atas tadi , ada baik ada buruknya. Amun yang pamulaan ( manyadiakan jamuan luar adat ) baiknya orang nang tulak tiga ampat buah rumah orang aruh sahari, kawa makan salain makan nasi
( Kada pang parut jadi buntau ! ). Kada baiknya pulang, bila orang mamakan bubur kacang haja ( contoh ! ) , makanan nasi nang disadiakan boleh jadi banyak kainak jadi balabihan. Ditakutani kainak tabuang pulang sudahnya….
Pakara manyuruh ‘ katering ‘ mamasak pulang , baiknya bubuhan higa mahiga rumah atawa kariah kawa tulak banyak rumah orang aruh ari tu. Pasal kada bagawi basasadi di rumah orang aruh tadi. Kaya kabiasaan.
Buruknya pulang, amun manyuruh ‘ katering ‘ manyadiakan makanan kaluko jalinan masarakat higa mahiga sasain longgar. Ditahakan kainak, bila ada ari lawatan ( kejubus – ujar orang Jawa ) banyak nang kada mau datang manolongi gawian lagi !. Pasalnya sudah tabiasa, aur manyurung tangan makan haja di rumah orang aruh….
Napa pulang pandapat andika sabarataan ?....
Tiada ulasan:
Catat Ulasan