Sasakali basurah nang ada hubungkait awan politik kada salah, kaluko leh...Mau kada mau kita sabarataan sabujurnya tapaksa umpat bapolitik wayah pilihanraya. Kada kiralah , politik subalah mana nang handak diumpati. Pilihan masing-masing pang !.
Surah nang dikira ‘ hangat ‘ wayahni kada lain pasal ada wakil rakyat nang hudah ‘ malonjat ‘ ka pati lain ( sabarataan tahuan hudah ! ). Surah ni kada kira di mana wadahnya, ada haja nang manyurung pandirannya.
Dalam sabuah pandiran di rurungku kopi ada kakawanan bahujah. Ujarnya, sabujurnya sambatan maloncat tu kada kana. Paulahan maloncat tu maknanya ada halangan kada kawa dilalui, tarus diloncati. Kaya kita handak manyubarang parit. Bila kadada titian, di situ pulang ada parit , maka tapaksalah diloncati.
“ Wakil rakyat nang saekung tu kadada halangan apa-apa. Handak masuk parti lain atawa bagana di patinya saurang kadada napa-napa halangannya. Kadada sasiapa manangati “ , ujar saekung kakawanan nang tapintar basurah. “ Jadi, kada kana disambat maloncat ‘, ujarnya lagi.
Kilip-kilip mata nang lain mandangarkan.
“ Jadinya , napa nang sasuai disambat ? “ ujar nang wani mahual
“ Disambat baugah atawa manyubalah haja “, ujarnya.
Takurihing sabarataan nang mandangar. Asa bujur pada pikiran, kaluko…
“ Aku kada katuju disambat baugah atawa manyubalah. Aku katuju amun disambat maninggalkan wadah “ , ujar saekung kulaan nang tatuha saikit.
(Jadiam hinggan di situ dicaritakan…. )
Labih kurang kayaitulah pandiran nang suah ulun mandangarkan. Masing-masing handak mambujurkan sambatan saurang haja !. Padahal nang disambat tu sama haja…..
Sabujurnya, kayaitulah cara orang kampungan umpatan basurah politik. Kabanyakannya kada pati mahirani banar pasal wakil rakyat tu maloncat ka parti lain. Maloncat atawa kada maloncat sama haja… Cumanya sahibar handak umpatan mamandir pasal ’ poltik ’ banarai…. ‘ Jangan katinggalan zaman ‘ ujar orang wahini.
Walau kayapa gin , memang ada orang kampungan nang bujur-bujur umpat maambil tahu babanaran pasal politik nagara. Hidin tu bujur-bujur orang nang taumpat awan politik kapatian. Kaya AJK pati politik di paringkat cawangan kampong atawa kawasan. Orang-orang ni tahan bahabang muha babahas amun sambatannya ada nang mahapak !.
Amun lain-lain tu sahibar umpat basurah banarai !.
Tiada ulasan:
Catat Ulasan